Кузги гулим

Куз интиҳога ҳисобот терар...

Шу  чоғда сен билан туташди йўлим.

Дилимга кўкламнинг умидин берар

Ҳазонлар фаслида гуллаган гулим...

Юракка чўғ тушди олов фаслида

Ёндию атрофга сочилди кулим.

Қонимга сариқ ранг берган аслида

Тўзонлар фаслида гуллаган гулим.

Кунларнинг шукуҳи, завқи ўзгача,

Кўзимни қувнатар бу фасли сўлим

Айланиб борадир равон сўзгача.

Мезонлар фаслида гуллаган гулим

Юракка кузмонанд бир ғайрат берди,

Ёзмасам ёрилиб кетади дилим.

Саҳарги садога тенг ҳайрат берди

Азонлар фаслида гуллаган гулим!

ИЛТИМОС, ХУДОЙИМ...

Ортиб кетди яна менинг гуноҳим,

Кимга ёриламан, Ўзингдан бошқа?!

Битта таскинингга зорман, Илоҳим,

Малҳам йўқ қалбимга сўзингдан бошқа.

Билмайман, жой борми менга аршингда,

Ўзимни беҳиштга чоғламоқчиман.

Илтимос, Худойим, ҳозир қаршингда

Озгина ўзимни оқламоқчиман...

Ҳақнинг заррасиман...

Ҳақнинг заррасиман, Ҳаввонинг насли

Сийланганим шу-да, аёлман бекам

Бахт шудир иккала дунёда асли –

Пойимга жаннатни тўшаган Эгам.

Яратгач, Ўзидан берди қатра нур

Қалбимга оташдай меҳрни қўшган

Аёллигим ўзи – энг олий сурур,

Томирда қониммас, муҳаббат жўшган.

БУ ИШҚ МЕНИ ҚЎЙМАЙДИ ОМОН...

Қаландарман... хажрингда ёниб

Эс-ҳушимдан айрилдим тамом!

Бораяпман ўзимдан тониб,

Бу ишқ мени қўймайди омон!

Кемиради ёшимни йиллар,

Рухим хаста, вужудим бежон.

Умр бунча секин симиллар,

Висолингга етаман қачон?!

ҚИШ...

Таъсирини қилди ишқимизга ҳам

Орамизни совутиб қўйди.

“Яхшиликка”, дея иккимизга ҳам

Кўнглимизни овутиб қўйди...

Илиқ сўзлар гапирмай қўйдик,

Кунлар салқин бўлгандан бери

Кўришсак ҳам, қовоқни уйдик

Кўкка булут тўлгандан бери

Оппоқ қорга айлансам қани...

Оппок қорга айлансам қани

Аршдан тушиб орзунг кулдирсам

Эрта тонгдан нигоҳинг тушса,

Вужудингни завққа тўлдирсам!

Қўлларингга олсанг ҳовучлаб

Эриб кетсам меҳринг тафтидан.

Юзларимга аста қўйсанг лаб,

Сўнг сирғалиб оқсам кафтингдан...

Соғинганман...

Онгимда бошланди кескин жараён:

Бедор хўжайралар танда бетиним

Саккиз минг соатки, қилар ғалаён

Сенсиз йиғлар уч юз қирқ куним.

Соғинганман... чўтлаб кетаман.

Ҳижроннинг ранги

Муҳаббатнинг асли ранги оловранг,

Қалбим ўчоғига бўлди қалов ранг,

Ўзи томон чорлар дилни ялов ранг,

Айтинг, ҳижроннинг-чи, ранги қанақа?

Сабр ранги кўк, бахт ранги пушти,

Саодатнинг ранги сариққа кўчди,

Туйғулар ранг бўлиб кўнгилга тушди:

Айтинг, ҳижроннинг-чи, ранги қанақа?

Истасанг...

Мен шундай севаман, вужудим кўприк,

Асли қалб сийланган меҳрдан бекам.

Бу ишқ бир ўзимга қиляпти кўплик,

Истасанг, кел, бирга кўрайлик баҳам.

Мен шундай севаман, ҳаёлим қанот

Айланиб кетади чархим самога

Дунёга боғланиш руҳим учун ёт,

Истасанг, мен билан кел уч, самода.

Азон товуши

Мени уйғотсайди азон товуши

Худди уйдагидай, эшитсам элас...

Ҳар тонгда ортади кўнгил ёниши:

Бу Ерлар барибир меники эмас!

Кўзимни очяпман ҳар саҳар қўмсаб,

Ватанни кўраман сал кўзим юмсам.

Олислаб кетганим севмаганиммас,

Қолдим деганимас  тақдирга кўнсам.

Мен сизни шунчаки севмайман

Мен сизни шунчаки севмайман,

Таним айрилса ҳам руҳ тортаверар

Гарчи сизга очиқ бир сўз демайман,

Кундан кунга дилда чўғ ортаверар

Эркалаб юборди мени Худойим

Эркалаб юборди мени Худойим,
Нимани сўрасам накдини бериб.

Дуога қўл очсам қайтармай доим

Сийлаётир аёллик бахтини бериб.

Индамай севаман

Ноқулай вазият. Ортиқча севгим,
Юрагим ҳадяси сиз учун малол.
Гарчи гуноҳлар ҳам эмасдир тенгим,
Аммо ишқ мен учун ҳалолдан ҳалол.

Ёмғирнимас, сизни соғиндим

Ногоҳ дилга солиб қўйди чўғ,

Кутилмаган дилга яқин сўз.

Жоним, сизнинг баҳоингиз йук,

Сиз хеч кимга ўхшамагансиз!

Сизга баҳорларни совға қиламан

Сизга баҳорларни совға қиламан

Икки дунёларга татирлик, тотлик

Қайта яшнагайсиз мен-ла, биламан,

Мазмунга тўлдирар умрингиз шодлик

Танланганман

Танланганман...

Тангрим қўйиб бўлган асл баҳони.

Мен Унинг нафасидан жонланганман:

Қалбимда жойлашган Ҳақнинг макони.

Йўқолиб боряпман васлингни истаб

Сен бўлиб қоляпман, мен кетаяпман

Аршга чиқиб қолдим ўзимни излаб,

Кўнглимда Аллоҳни кашф этаяпман...

Интернетда ўтириб...

Мусофирлик юракдан ўтар,

Соғинч тилар қалбни беомон.

Ҳижрон тиғи юракка етар,

Хотиралар қийнайди ёмон.

Бир эдим...

Бир неча бўлакка бўлиниб кетдим:

Руҳ, вужуд, тафаккур, яна нималар...

Ҳаммасин ўз ҳақиқати бор,

Ҳар бирин талаби мени нимталар.

Қувват ҳақида

Ўзгаради кунда ўйларим,

Манзил сари шундай бораман.
Туҳфа этиб сизга куйларим,
Завқингиздан қувват оламан.

Ҳаққа ошиқликни кимдан ўргандим

Ҳаққа ошиқликни кимдан ўргандим?

Яралгандан буён қонимда борми?!
Ўзидан туганмас меҳр сўргандим,
Менга учратдими сиздайин ёрни?